Kua pānuihia ngā whiringa toa AMA mō ngā tohu Tūī, mō Te Māngai Pāho Mana Reo me Te Manu Taki Māori o te Tau
He whakatairanga i tētehi tau hirahira mō ngā waiata reo Māori.
E whakahī ana a Aotearoa Music Awards ki te pānui i tētehi kāhui manu mātārae i ngā whiringa toa mō ngā tohu Tūī, mō Te Māngai Pāho Mana Reo me Te Manu Taki Māori o te Tau 2026.
Inā te hirahira o te tau 2025 mō ngā waiata reo Māori: ko tā ngā tāngata o Aotearoa pāho tikinoa i ngā waiata reo Māori i koni atu i te 69 miriona pāhotanga, he pikinga mai i te 64 miriona i te tau 2024, ā, ka reatoru te hokonga o ngā pukaemi waiata reo Māori i tērā o te tau o mua. Me te aha anō, o ngā waiata katoa o Aotearoa i pāho i ngā reo irirangi i te tau 2025, i nui ake i te 20% o aua waiata he mea reo Māori.
Ko tā Te Māngai Pāho tohu Tūī Mana Reo he whakamihi i ngā hopunga puoro e 50% te itinga o te reo Māori kei aua waiata. Ka whai wāhi ngā hopunga puoro takitahi, ngā pukaemi, me ētehi atu eminga puoro pērā i ngā EP.
Ko te hunga eke ki te whiringa toa mō te tohu Tūī Te Māngai Pāho Mana Reo 2026, ko:
- Hamo Dell (Ngāti Porou) mō ‘Tā Roha’
- Marlon Williams (Kāi Tahu, Ngāi Tai) mō Te Whare Tīwekaweka
- MOHI (Te Tai Tokerau, Tauranga Moana, Ngāti Kahungunu ki Te Wairoa) mō ‘Ka Rea’ (me Pare)
- Nikau Grace (Te Whānau a Apanui, Ngāti Tūwharetoa, Te Arawa) mō ‘He AhaTe Aha’(me Te Kapa Haka o Ngāti Whakaue)
- Rob Ruha (Te Whānau ā Apanui, Ngāti Porou, Tainui, Ngāti Tūwharetoa, Te Arawa, Ngāpuhi, Rongowhakaata, Ngā Ariki), Troy Kingi (Te Arawa, Ngāpuhi, Te Whānau ā Apanui) and Kaylee Bell mō ‘Matariki Hunga Nui’
- Stan Walker (Tūhoe, Ngāi Te Rangi, Ngāti Ranginui, Ngāti Pūkenga, Tūhourangi Ngāti Wāhiao, Ngāti Porou, Ngāti Whakaue, Ngāi Tahu) mō ‘Mō Āke Tonu’ (me Hana-Rāwhiti Maipi-Clarke)
Ko te paearu whiriwhiri matua mō te tohu Tūī Mana Reo ko tērā e whai ai te puoro kia tupu te aronga me te matomato o te reo Māori me te ao Māori mā roto i ngā hopunga puoro arumoni. Ko te kounga ā-toi, te auau o te tuku puoro e noho mātāmua mai ana ko te reo Māori, me te angitu ā-arumoni nei ētehi atu āhuatanga ka tirohia.
Ko te hunga eke ki te whiringa toa mō te tohu Tūī Te Māngai Pāho Te Manu Taki Māori o te tau 2026, ko:
- Hori Shaw (Te Whakatōhea, Ngāti Porou)
- MĀ (Ngāti Raukawa, Ngāti Porou, Tūhoe, Ngāti Kahungunu) mō Blame It On The Weather
- Marlon Williams mō Te Whare Tīwekaweka
- Stan Walker
- TAWAZ (Ngāti Rangitāne)
- Te Wehi (Te Whānau ā Apanui, Ngāti Porou)
Ko te tohu mō Te Manu Taki Māori o te Tau, he whakamihi i te manu tīoriori heke i ngā kāwai whakapapa Māori, ko ana puoro e whakaata ana i te tuakiri Māori motuhake, he whakapuaki rānei i te ao Māori.
Whai muri iho i te whakarewanga o tana pukaemi reo Māori tuatahi, o Te WhareTīwekaweka , kua eke a Marlon Williams ki ngā whiringa toa mō ngā tohu e rua, arā, mō te Mana Reo me Te Manu Taki Māori o te Tau, he tuatahitanga tērā. I te whakarewanga o Te WhareTīwekaweka ka kotahi atu te ekenga ki te taumata #1 i te Rārangi Pukaemi 40 Tiketike, koirā tētehi o ngā pukaemi haukāinga e toru anake i pērā i te tau 2025 – koirā hoki te pukaemi waiata reo Māori tuatahi a tētehi ringatoi puoro takitahi i eke ki te taumata tiketike. Kua eke hoki a Williams ki te taumata whiringa toa mō tā Irirangi Te Motu Tino Puaemi o te Tau, tā Spotify Tino Waiata o te Tau - mō ‘Aua Atu Rā’; me Te Tino Reo o te Tau.
Kua eke anō te toa Mana Reo me Te Manu Taki Māori o te Tau 2005, a Stan Walker ki te whiringa toa mō aua wāhanga e rua. Āpiti atu, kua eke tahi rāua ko tana hoa ringatohu, ko Abe Mora, ki te whiringa toa mō tā Irirangi Te Motu Te Taumata o te Ataata, mō ‘Mō Āke Tonu’ i whai wāhi atu ai a Hana-Rāwhiti Maipi-Clarke.
I mahi tahi a Rob Ruha rātou ko Troy Kingi, ko Kaylee Bell i te marama o Mei 2025 ki te hopu i tētehi ngaringari ngātahi mō Matariki, ko ‘Matariki Hunga Nui’. Nā taua waiata, kua eke te tokotoru – he toa Tūī katoa o mua – kua whiria ngātahitia mō te tohu Mana Reo. Kua eke hoki a Kingi ki te whiringa mō Te Manu Takitahi o te Tau me Te Manu Taki Ātete o te Tau mō tana kaupapa, mō Troy Kingi Presents: Night Lords, ā, e rua anō ngā tautapanga o Bell.
Kua eke Tā te Iwi toa o te tau 2024, me te toa o Te Iti Rearea o te Tau 2025, a Hori Shaw ki te whiringa toa mō Te Manu Taki Māori o te Tau, he tuatahitanga tērā. Ka mutu, kua tautapangia anō rā i ngā wāhanga mō Te Manu Taki Taketake o te Tau me Te Tino Waiata o te Tau, rāua tahi ko tana hoa, ko Te Wehi mō tā rāua waiata eke ki te taumata haukāinga, mō ‘Ready To Ride’. Kua eke hoki a Te Wehi ki te whiringa toa mō Te Manu Taki Māori o te Tau me Te Manu Taki Taketake o te Tau.
Ka kapi i a Hamo Dell (‘Tā Roha’), i a MOHI (‘Ka Rea’ me Pare), rātou ko Nikau Grace (‘He Aha Te Aha’ me Te Kapa Haka o Ngāti Whakaue) ngā kōwhiringa mō te tohu Tūī, mō Te Māngai Pāho Mana Reo 2026.
Kua kōwhiritia anō rā te toa Mana Reo me Te Manu Taki Māori o te Tau 2024, a TAWAZ rāua ko MĀ mō te tohu Tūī a Te Māngai Pāho, Te Manu Taki Māori o te Tau. Kua eke hoki a MĀ ki te whiringa toa mō te tohu Irirangi Te Motu Te Pukaemi o te Tau me Te Manu Taki Whanokē o te Tau.
Hei tā te kaihautū o Te Hua Waihanga, o Te Māngai Pāho, tā Nadia Marsh (Ngāti Raukawa, Ngāti Maniapoto, Te Rarawa):
“Whakahīhī ana a Te Māngai Pāho ki te tautoko i ngā tohu Tūī Mana Reo me Te Manu Taki Māori o te Tau, hei whakatairanga i ngā waiata reo Māori me ngā ringatoi puoro Māori. He mea whakahiamo te kite atu i te kanorau me te nui haere o ngā waiata reo Māori arumoni e whakaputahia ana ki ngā pae katoa, e toro nei i te minenga whānui, tauhou anō rā.”
Ki tā te kaihautū o Recorded Music, ki tā Jo Oliver:
“He nui ake ngā waiata reo Māori e whakaputahia ana hei arumoni, he nui ake anō rā e rangona ana, ko ngā whiringa toa mō te tohu Mana Reo me Te Manu Taki Māori o te tau e whakaata ana i te whānuitanga o ngā pūmanawa puoro Māori i ngā momo puoro maha ki Aotearoa.”
“Ka nui te mihi ki a Te Māngai Pāho mō tana tautoko i ēnei Tūī, me tā te whakahaere tautoko tonu i ngā tohu Tūī o Aotearoa. E whakahī ana a Recorded Music i te whai wāhi atu ki te whakatairanga tonu, ki te whakapāho hoki i ngā ringatoi puoro Māori ki te kāinga, ki te ao whānui anō rā.”
Ka tū te Aotearoa Music Awards 2026 ā te Tāite 28 o Mei ki The Civic, ki Tāmaki Makaurau. Ka pāho mataoratia e te Hoa Pāho Ōkawa, e RNZ. He mea tautoko te pāhotanga mataora e Irirangi Te Motu | NZ On Air me Te Māngai Pāho.
Ko te roanga atu o ngā kōrero mō ngā whiringa toa o Aotearoa Music Awards 2026 kei konei
Mō Aotearoa Music Awards
Ko Aotearoa Music Awards te hui nui o te tau i te rāngai puoro, e whakatairanga ana i ngā pūkenga puoro me ngā waiata nō Aotearoa. He hui whakamihi i ngā angitutanga puoro hirahira o te tau, me te aha anō, he pae whakatairanga i ngā ringatoi puoro pūhou. E 60 tau tōna hītōria, kua whanake a Aotearoa Music Awards hei whakaata i tō tātou tuakiri ahurea motuhake. Kua whakarewahia ngā aramahi puoro, kua kōrerotia ngā pūrākau mō ngā ringatoi puoro, kua hua ake ngā maharatanga motuhake.
Ko Recorded Music NZ te kaiwhakaputa i Aotearoa Music Awards, ā, ka noho hei kaitiaki – pupuri i ngā taonga tuku iho, whakatairanga i ngā tino waiata o te wā, e para ana i te huarahi mō ngā ringatoi puoro o āpōpō.
Mō ētehi atu kōrero, tēnā hono atu ki aotearoamusicawards.co.nz
Aratohu Whanonga
E ū ana a Aotearoa Music Awards ki tētehi taiao haumaru e whai wāhi ai te katoa o te hunga whaipānga. Me ū te katoa o te hunga whai wāhi mai ki tā AMA Code of Conduct
Ngā Hoa Kōtui o AMA 2026
Irirangi Te Motu | NZ On Air, Te Māngai Pāho, Spotify, RNZ, Auckland Live, JD Sports, BurgerFuel, 5GUM, Te Taura Whiri i te Reo Māori | Māori Language Commission.
Tirohia ngā pitopito kōrero mō ngā hoa kōtui o AMA 2026 ki konei
Tēnā tukuna ngā pātai pāpāho ki a:
Lauren Went, Pead
lauren.went@pead.co.nz
027 363 0291