07 April 2025

Kua whakapuakina ngā whiringa toa AMA mō ngā tohu Mana Reo, Manu Taki Māori o te Tau Tūī a Te Māngai Pāho

He whakanui i ngā kaiwaiata Māori me te awenga o te waiata Māori ki te ahumahi puoro o Aotearoa.

Nō Aotearoa Music Awards te hōnore ki te whakapuaki i tētahi huinga whiringa toa autaia rawa atu mō ngā tohu Mana Reo me te Manu Taki Māori o te Tau Tūī a Te Māngai Pāho i 2025.

E whakanui ana te tohu Mana Reo i ngā hopunga kei tua i te 50% kei te reo Māori. E māraurau ana ngā waiata, ngā kōpae me ētahi atu hopunga pēnei i ngā EPs.

Ko ngā whiringa toa mō te tohu Tūī a Te Māngai Pāho, arā ko te Mana Reo i 2025 ko:

  • Anna Coddington (Ngāti Tūwharetoa, Te Arawa, Ngāti Whakaue) – Te Whakamiha
  • Haami Tuari (Te Aitanga a Hauiti, Ngāti Porou, Te Aitanga a Mahaki, Ngāi Tāmanuhiri, Te Whānau a Apanui, Ngāti Kahungunu, Rongomaiwahine, Ngāi Tuhoe) – ‘Taku Kaenga’
  • Jordyn with a Why (Tainui Āwhiro, Mulifanua Lalovi, Falelatai, Vaimoso) – ‘Reia’
  • Stan Walker (Ngāi Tūhoe, Ngāi Te Rangi, Ngāti Ranginui, Ngāti Pūkenga, Tūhourangi Ngāti Wāhiao, Ngāti Pikiao, Ngāti Whakaue, Ngāti Porou, Ngāi Tahu, Ngāpuhi) – ‘Māori Ki Te Ao’
  • TAWAZ (Ngāti Rangitāne) – ‘Tātarakihi’ (feat. MOHI)
  • Tuari Brothers (Te Aitanga a Hauiti, Ngāti Porou, Te Aitanga a Mahaki, Ngāi Tāmanuhiri, Te Whānau a Apanui, Ngāti Kahungunu, Rongomaiwahine, Ngāi Tuhoe) – ‘Higher’

Ko te paearu matua mō te Tūī Mana Reo ko tā te puoro whai ki te whakapiki i te arongia me te ratangia o te reo Māori me te ao Māori mā ngā puoro auraki. Ka whai wāhi hoki te kounga ā-toi, te rite tonu o ngā whakaputanga e whakamātāmua ana i te reo Māori, me te angitu ā-arumoni.

Ko ngā whiringa toa o te tohu Tūī a Te Māngai Pāho, arā ko Te Manu Taki Māori o te Tau i 2025 ko:

  • Anna Coddington – Te Whakamiha
  • Corrella (Ngāi Te Rangi, Ngāti He, Ngāti Pukenga – Pipiwharauroa & Ngawaiwera Campbell) me (Ngāi Tūhoe – Te Naawe Tupe) – Skeletons
  • Jordyn with a Why – Hibiscus Moon, Love & Justice
  • MOHI (He maramara nō Rāhiri, nō Te Tai Tokerau whānui. Tauranga Moana, Tauranga Tāngata, he Ngāti Tapu ahau. Nō Kahungunu, nō Te Wairoa hōki)
  • Stan Walker
  • TAWAZ

E whakamānawa ana tēnei tohu i tētahi ringa toi ko āna puoro ka whakaatu i tētahi tuakiritanga Māori motuhake, e whakapuaki ana rānei i te ao Māori.

Ko te toa tuatahi o Te Manu Mātārae o AMA 2024, a Stan Walker, kei te rārangi whiringa toa mō te Spotify Te Tino Waiata o te Tau me Te Māngai Pāho Mana Reo nā tana waiata rongonui nei, a ’Māori Ki Te Ao’. Kua noho taua waiata ki te tihi o te rārangi Tukutahi Te Reo Māori Tiketike 10 mō te tau 2024, e 55+ wiki te roa ki te #1. Kei te whakataetae hoki a Walker i Te Manu Taki Māori o te Tau, Spotify Te Tino Reo o te Tau | Te Tino Kaiwaiata Takitahi, me Te Manu Taki Manako o te Tau | Te Tino Kaiwaiata Soul/RnB ki AMA 2025.

Kua uru hoki a Anna Coddington, toa o te Tohu 2024 APRA Silver Scroll | Kaitito Kaiaka, ki ngā wāhanga Te Manu Taki Māori o te Tau me te Mana Reo, tae noa atu ki te Tino Pukaemi o te Tau, nā tana puka whakaemi reorua tuatahi, a Te Whakamiha.

Ko TAWAZ, te toa o te Mana Reo me Te Manu Taki Māori o te Tau i te tau 2024, kua hoki mai anō ki ngā whiringa toa mō aua wāhanga i te tau 2025. Ko tāna waiata kua tohua ki te Mana Reo, a ‘Tātarakihi’, he mea mahi tahi me MOHI, kei ngā whiringa toa hoki tērā i Te Manu Taki Māori o te Tau.

Ko Corrella, ngā toa o Te Tino Waiata ā-Iti Rearea o te Tau me Te Manu Taki Taketake o te Tau i 2024, kua hoki mai me tā rātau puka whakaemi nō te tau 2024, a Skeletons. Kei te whakataetae te rōpū tokowaru nei i Te Tino Kāhui Manu Taki o te Tau, Te Manu Taki Taketake o te Tau, me Te Manu Taki Māori o te Tau.

Kua hoki mai anō a Jordyn with a Why ki ngā whiringa toa mō ēnei Tūī e rua, pērā i te urunga ki aua wāhanga i te tau 2024. Ko tāna pukaemi tuatahi Hibiscus Moon, Love & Justice e whakataetae ana i Te Manu Taki Māori o te Tau, me tāna waiata ‘Reia’ i te wāhanga Mana Reo.

Kei te whakataetae hoki a Haami Tuari i te Mana Reo hei kaiwaiata takitahi nā ‘Taku Kaenga’, ā, me ōna tuākana i te rōpū tokotoru Tuari Brothers i uru ki ngā whiringa toa AMA i te tau 2024, i tēnei tau, ko tā rātau waiata rongonui nei, a ‘Higher’ kua uru.

Hei tā Jo Oliver, te Tumu Whakarae o Recorded Music NZ:

“He kaiwaiata whakamīharo ngā whiringa toa o te Mana Reo me Te Manu Taki Māori o te Tau mō te tau 2025, ā, e rangona whānuitia ana ā rātau mahi puta noa i Aotearoa. Ka nui tō mātau hari ki te whakanui i a rātau ki AMA ā tēnei Mei.

“Ka mihi tonu ki a Te Māngai Pāho i tā rātau tautoko ā-pūtea i ēnei Tūī, me tā rātau tautoko tonu i te kaupapa o AMA. E hari katoa ana mātau o Recorded Music ki te āwhina, ahakoa he iti nei, i tā rātau mahi nui ki te whakanui i te reo Māori me ngā kaupapa Māori, me te hiki i te mana o ngā kaiwaiata Māori me te waiata Māori ki Aotearoa, ki tua atu anō hoki.”

Ka tāpaetia te tohu te Mana Reo me Te Manu Taki Māori o te Tau a Te Māngai Pāho i 2025 ki te Aotearoa Music Awards ā te Rāpare 29 o Mei i te Viaduct Events Centre ki Tāmaki Makaurau.

Tirohia ngā taipitopito katoa mō ētahi atu o ngā kaitono AMA 2025 ki konei

Mō Aotearoa Music Awards
Ko Aotearoa Music Awards te whakaaturanga ā-tau mō te ahumahi puoro, e whakanui ana i ngā kaiwaiata me ngā puoro nō Aotearoa. Ka whakanui te kauapa i ngā angitutanga ā-puoro nui katoa o te tau, me te whakarite hoki i tētahi pae e whakatairanga ana i ngā kaiwaiata hou. Ko tōna tūāpapa ko te hītori 60 tau, kua whanake a Aotearoa Music Awards ki te whakaatu i tō tātou tuakiritanga ā-ahurea motuhake. Kua whakarewa i ngā aramahi puoro, kua kōrerohia ngā kōrero o ngā kaiwaiata, ā, kua hua ake i a ia ētahi wā mahara roa.

Ka whakaputa a Recorded Music NZ i a Aotearoa Music Awards, me te aha, koia tōna kaitiaki – e pupuri ana i tō tātou takenga ā-puoro, e whakanui ana i ngā tino waiata o nāianei me te para i te huarahi mā ngā kaiwaiata o āpōpō.

Tauākī Whanonga
E ū ana a Aotearoa Music Awards ki tētahi taiao haumaru, kauawhi anō hoki mō te katoa ka whai wāhi mai. Katoa ngā kaiuru, tae ana ki te hunga tautapa, me whai i Tauākī Whanonga a AMA.

Ngā Hoa Rangapū o AMA 2025
Tirohia ngā pārongo hoa rangapū katoa o AMA 2025 ki konei

Tēnā tukua ngā pātai pāpāho ki:
Lauren Went, Pead
lauren.went@pead.co.nz
027 363 0291